August 22nd, 2010 by Shrikant Tiwari
22,AUG`2010
Amitabh Bachchan Ko Maine Kabhi Nahin Dekha. Kabhi Nahin Mila. Kabhi Nahin. Haan Unki Filmen Dakhi Hain. Kabhi-Kabhar Sarkari-Gair-Sarkari Samarohon Ke Live Telicast Mein TV Pe Unki Chhavi Dekhi Hai. Ru-Ba-Ru? Na! Kabhi Nahin.
#1
Mujhe Yaad Nahin Ki Amitabh Bachchan Ko Pahli Bar Maine Kis Film Mein Dekha Tha. Khoob Yaad Karne Par Bhi Yaad Nahin Aata Ki Amit Ji Ki Kaon Si Film Maine Sabse Pahle Dekhi Thi. Haan, Baacho Didi {Jayashree Di} Batati Hain Ki Who Hamare Ek Chachere Bhai Ke Sath Ranchi Ke Sandhya Cinema Mein ZANJEER Dekhne Gayi Thi, Tab Ticket Ke Liye Bahut Mara-Mari Aur Dhkka-Mukki Kar Ke Apne Kapde Aur Nahin Ke Barabar Baal Nuchwane Ke Baad Bhai Ne 2 Ticket Hasil Ki Thi Aur Movie Ka Aanand Uthaya Tha. Uss Samay (…in_1973) “Yaari Hai Eemaan Mera Yaar Meri Zindagi” Gane Ko Sun-ne Ke Liye Bhi Itni Jaddo-Jahad Karni Padi Thi Ki Sun-ne Wala Aur Suna-ne Wala Khud Ko Dhanya Samajta Tha. Phir Bhi “Zanjeer” Main Uski Release Ke Lagbhag 10 Saal Baad Dekh Paya. Uss Din Smt. Indeera Ji Ranchi Aayin Thin. Babuji Unhe Dikhane Hum Sab Ko Ranchi Le Gaye Thhe, Par Kaun Sa Saal Tha Ye Yaad Nahi Aata. Issiliye Ye Bhi Yaad Nahi Aata Ki Amit Ji Ki Pahli Movie Maine Kaun Si Dekhi Thi. Jabki Sholay, Deewaar … Aur Unki Doosri Filmen Main Dekh Chuka Tha. Aur Tan-Mann-Jatan Se Unka Aisa Mureed, Aisa Prasanshak, Aisa Deewana Ban Gaya Jo Iss Jeewan Mein Mere Mann Se Amitabh Bachchan Ki Sarva-Shreshthata Ke Aage Kisi Bhi Doosre Star Ki Mahatta Ko Mujhe Nahin Man-ne Deta. Kam-Se-Kam Mere Iss Jeewan Mein Amit Ji Ki Jagah Koi Doosra Le Hi Nahin Sakta. Koi Nahin.
#2
Amit Ji Se Pahle Main Rajesh Khanna Ka Aisa Hi Deewana Tha. “Haathi Mere Saathi” Aur “Kati Patang” Dekhne Ke Baad To Ye Deewangi Aur Badh Gayi Thi. Rajesh Khnna Ki Alochana Main Sun Kar Bahut Vichalit Ho Jaya Krta Tha.
#3
Dharam Pa Ji {DHARMENDRA} Ki Filmen Bhi Mujhe Bahut Bhaati Thi. Khel-Khel Mein Jab Hamara Koi Dost Kahta Ki Chalo Cinema-Cinema Khelen To Main Rajesh Khanna Ban-na Chhta Tha, Dharmendra Nahi. Kyon Ki Main Bahut Dubla-Patla Tha Aur PRAN Ka Role Khelne Wala Dost Mujhse Tagda Tha. Iss-Liye Main Gaana Gane Wale, Dialoge Bolne Wale Part Khelna Jyada Sahaj Samajhta Tha. Dharmendra Ka Role Pados Ke Anup Bahia Hi Khelte The. Ab Tak Amitabh Ban-ne Ka Samay Nahin Aaya Tha. Jab Aisa Samay Aaya, Matlab Jab Amit Ji Ka Jaadoo Hamare Sar Chadh Kar Bolne Laga Tab Tak Umra (age) Aage Nikal Chuki Thi. Tab Mera Role Kahaani Sunane Ka Fix Ho Gaya. Main Amit Ji ki Filmen Dekh Kar Uski Kahani Doston Aur Chhote Bhaiyon Ko Sunaya Karta Tha. Kahaani Kahne Ke Darmyan Main Mann-Hi-Mann Khud Ko Amithbh Hi Smajhne Lagta Tha Aur Doston Se Wah-Wahi Loot-ta Tha.
#4
1973 Mein Main Teesri Kaksha (…in Class 3) Mein Padhta Tha. Years Ke Last Dijit Ke Saath-Saath Meri Kakshayen Bhi Badhti Gayin. Isi Kramm Mein Maine 1975 Mein Babuji Ke Saath Ranchi Ke Sujata Cinema Mein “Sholay” Dekha. Film Dekhna Aur HERO Ko Khud Mein Aatmsaat Karne Ki Jaise Mujhe Bimari Lag Gayi Thi. “Vijay” Ban-na “Vijay” Ke Jaisa Behave Karna Aasan Lagta Tha Lekin Main “Jay” Ko Kabhi Bhi Atmsaat Nahi Kar Saka. “Sholay” Ka Jabardast Climex Dekhne Ke Darmyan Main Bahut Emotional Ho Gaya Tha. Kitne Hi Dino Tak Ek Mayusi, Ek Bojhil Udasi Mere Par Hawi Rahi. Yahi Haal “Deewaar” Dekh Kar Hua.
#5
1977 ki Release “Khoon-Paseena” Ne Mujhe Style Sikhya, Jo Main Akele Mein Khud Ko Khush Karne Ke Liye “Tiger”{Khoon-Paseena mein Amit Ji Ka Kirdaar} Ke Saman Munh-Naak bana kar Act Kiya Karta Tha Aur Chatkhaare Le-Le Kar Usski Kahaani Doston Ko Sunaya Karta Tha. “Khoon-Paseena” Dekhne Ke Samy Bada Gazab Ho Gaya Tha. Mere Mama Mere Sath Gaye The, Koi Doosra Kaam Tha, Main Toh Iss Lalach Mein Gaya Tha Ki Daanw Lage-ga Toh Film Dekhunga, Aur Daanw Laga. Mera Dost Vinod Yahan Mere Sath Middle School Mein Padhta Tha, Uske Pitajee Police Ki Naukri Mein Jab Lohardaga Posted Thhe Tab Hum Dono Unse Cinema Maneger Ko Phone Karwa Kar Seat Booking Karwa Liya Karte Thhe, Yahi Hum-ne Ranchi Men Kiya Vinod Ke Pitajee Tab Transfer Ho Kar Ranchi Mein Sadar Thana Mein Thhe, Mere Israar Par Vinod Ki Bahan Chinta Didi Ne Apne Pitajee Se Kah Kar Sujata Cinema Mein Hamare Liye 3 Ticket Book Karwa Diya, Humne Night Show [NAO-SE-BARAH! 9PM to 12AM] Mein “Khoon-Paseena” Dekha. Woh Raat Humne Vinod Ke Pitajee Ke Service Quarter Mein Gujari. Lohardaga Mein Babuji Chinta Karte honge, Gussate Honge,..Sochte Hue Hum Subah Ghar Aane Ko Taiyaar Ho Kar Bahar Baithe Thhe Ki Ek Kali Ambassador Car/Taxi Mein Babuji Ko Thana Parisar Mein Aate Dekh Kar Hamare Pran Kaanp Gaye. Lekin Babuji Ne Hame Kuchh Nahi Kaha, Unhone Vinod Ke Pitajee, Daroga Saheb Se Kuchh Der Baaten Ki, Chinta didi, Jo Meri Bahnon Ki Saheli Thi, Ne Babuji Ko Chaay-Nashta Karaya. Fir Hum Babuji Ke Sath Car Se Ghar Laut Aye. Ghar Par Mere Muhalle Ke Doston Ne Mujhe Gher Liya Aur Kaha Ki “Khoon-Paseena” KI Kahani Sunao, Jo Maine Unhe Bade Tanmay Ho Kar Sunai.
#6
“DON” Film Ne Mujhme Jaan Foonki. “Khai Ke Paan Banaras Wala…” Geet Ka record Mere Mama Jab Babuji Ke Saath Calcutta Gaye Thhe Toh Wahan Se Kharid Kar Laye. “Amar-Akbar-Anthony”, Jise Maine Uski Release Ke 9 Ya 10 Saal Baad Dekh Saka, Ne Mujhe Khoob Hansna Aur Hansaana Sikhya. “Mr. Natwar Laal” Maine Babuji Aur Pure Parivar Ke Sath Ranchi Mein Dekha Tha. “Kaala-Patthar” Maine Jaggnnath-Puri Yatra Ke Darmyan 1979 Mein Odissa Ke Smabalpur Mein Dekha. “Khuddar”, “Desh-Premi” Maine Patna Mein Dekhi. Filmon Ko Release Date Ke Bahut Baad Dekhna Hamari Majboori thi, Kyon Ki Tab Hamare Shahar [LOHARDAGA] Mein Ek Hi Cinema Ghar Tha Jisme Sirf Wahiyat Fime Hi Laga Karti Thi. Jab Kabhi Koi Badi Hit Film Lagti Thi To Pura Shahar Jaise Ek Vishal Mele Mein Badal Jaya Karta Tha. Uss Samay Film Dekhne Jana Ek Badi Baat Mani Jati Thi, Jo Abhibhawak Ke Izazat Ke Baad, Dekhne Jate The Woh Aaine Ke Samne 1-2 Ghante Sajne Mein Lgatate The, Auraten Aur Ladkiyan Yun Sajne-Sawarne Baith Jaati Thin Jaise Kisisi Ki Shaadi-Baraat Mein Jana Ho. Hum Bhi Dhule, Naye, Press Kiye Hue Kapde Pahan Kar Baki Sabhi Ke Aage-Aage Tan Kar Jate Thhe. Cinema Ghar Ke Bahar Ka Mahol Aur Bhi Josh Badhane Wala Hua Karta Tha. Ticket Hasil Karne Ke liye Log Mar-Peet, Jhagda-Fasad, Dunga Tak Karne Par Utaru Ho Jaya Kate The. Ticket Booking Staff VIP Ka Darja Rakhta Tha Jo Shahar Ke Bade Aur Naamcheen Logon Ka Dost(!) Hampyala-Hamnivala Hua Karta Tha. Hum Logon Ko Agar Cinema Jana Hota Tha Toh Uski Taiyari Ek Saptah Pahle Se Shuru Ho Jati Thi. Film Prachaar {advertisement} Ki Gadi Pamphlet Udati Jab Hamre Muhalle Mein Aati Thi To Uske Loud-Speaker Ki Aawaz Sun Kar Bachche, Bade-Boodhe Gharon Se Bahar Nikal Aate The Auraten Gharon Ki Khidkiyon Se Jhank Kar Prachaar Gadi Par Lage Poster Par Apne Pasandida Actor/Actress Ko Dekh Kar Khoosh Hoti Thi. Sabhi Yojna Banane Mein Jut Jate The Ki Film Kaise Aur Kab Dekhi Jaye. Black Mein Ticket Kharidna Ek Vishesh Majboori Samajh Kar Anjaam Diya Jata Tha. Hamesha Nahin.
#7
Paanchvi_Chhathi_Saatvin (5th, 6th,7th Class) Ke Darmyan 1975-1976-1977 Tak Main Amit Ji Ki Sabhi Hit Filmen Lagbhag Dekh Chuka Tha. 1978-1979-1980-1981-1982- Tak “Namak-Halaal” Release Ho Chuki Thi Aur Main Itna Bada Ho Gaya Tha Ki Babuji Ki Izazat Milne Par Apne Mama Ke Sath Ranchi Film Dekhne Chala Jaya Karta Tha. Amit Ji Ki Aneko Filmen Maine Khaas Ranchi Ja Kar Hi Dekhi Hai, Hamare Shahar Mein Who Film Aate Pata Nahi Kitna Waqt Gujar Jata , Kaun Itna Intejaar Kare! Aakhir Aur Doston Ne Dekh Liya, Who Uss Film Ki Baaten Karenge Aur Mujhe Kudhna Padega, Iss-liye Main Kyun Peechhe Rahun! Chalo Mama Ko Patate Hain, Par Mamu Toh Ulta Mujhe Patane Mein Lage Hue Hain, Ki “Shrikant Babuji Se poochho Na, Are Bolo Na, Koi Bahana Banao…” Iss Tarah Jatan Kar Ke Hum Ranchi Ja Kar Filmen Dekha Karte The. Lekin Yah Koshish Sirf Aur Sirf Amit Ji Ki Filmon Ke Liye Hi Ki Jati Thi. Baki Ka Kya Hai, Yahan Lage-ga Toh Dekh Lenge.
…jari…
