Powered By Blogger

Monday, September 20, 2010

AMITABH BACHCHAN AUR MAIN #15 se aage

September 4th, 2010 by Shrikant Tiwari
#16
3,AUG`2010
Lohardaga 23:44PM (night/raat) start typing
Coolie ke release hone se pahle mere khud ke jeewan mein bahut si tabdiliyan ho chuki thin. Main school se college pahunch gaya tha. 26, july`1982 ko Amit Ji ko chot lagi thi….yeh samachaar hum tak pahunchne mein hi 3-4 din lag gaye thhe. Tab hame Amit Ji ko lagi chot ki gambhirta ka koi ehsaas nahin tha. Tab Main I.Sc. 2nd(final) year mein tha. …Uss din main doston ke saath college ke common room mein tha jab ek news paper mein iss durghatna ka vistrit varnan tha. Padh kar auro ka toh pata nahin mujhe sadma sa laga, mann uchaat ho gaya. Main ghar aa gaya. Sabka jeewan samanya gati se chal raha tha, lekin mere mann ki dasha asamanya thi. Main sahaj lagne ka aur apne kaam mein mann lagane ka bharsak prayaas karta tha lekin meri haalat mein koi sudhar nahin hua,  na hi main apna kaam dhang se kar pata tha. Uske baad roz main be-sabri se news paper ki pratiksha karta tha aur iss ummeed se paper padhta tha ki Amit Ji ke swasthya ke bare mein  koi shubh samachaar hoga lekin…nahin,…samachaar yeh hota tha ki ‘unki’ tabiyat bigadti ja rahi hai. He Bhagwaan…! Din bit-te gaye, saptahon baad bhi koi shubh samachaar nahin mila. Fir jaise ye hi ek vishesh musla rah gaya jis par discussion karna, apni-apni sunaana logon ka shagal ban gaya. Fir Amit Ji ke bigadte swasthya ke karan mere jaise logon ki toh chhodiye pure desh bhar mein chinta-fikr aur shayad dahshat ka mahaol chha gaya. Logon ne apni mannaten chod kar Ishwar se Amit Ji ke achchhe hone ki duaye mangni shuru kar deen. Main isske liye mandir toh nahi gaya na hi ghar ke calanders par chhape bhagwan ki tasweer ko dekh kar vinati ki, parantu haan … Main raat-raat bhar jagta rahta tha, need nahi aati thi, Main mann se hi na maloom kya-kya lat-pat baaten sochta tha ,…Amit Ji kab achchhe honge? …honge bhi ya nahin? …Anishtt ki aashnaka ne mujhe aisa trast kardiya tha ki main bimaar sa rahne laga. Mujhe badhawaas dekh kar kuchh doston ne (Local language mein) mera mazaak bhi udaya “…ka re ! re.. ! tor-{yours}-hero toh betta gelau…, aisne munh latkaile rahbe to tohon-{you too}-jalidiye jaibe…badi Amitabh-Amitabh kara halle, ab ka holau?…”, ghar mein daantt bhi padi. Jeewan swabhawik gati se apni chaal chalta raha, lekin main asamanya hota gaya. Cinema ghar band nahin hue thhe, unmein filme lagti thin, badlti thin lekin mera dhyaan unki taraf jata tak nahin tha, kyon jata? Amit ji ke bagair filmo ka kya arth? Maine filme dekhni chhod di. Filmon ke posters ko niharna chhod diya. Khamosh, udaas.., khinn…alsaya hua dekh kar Babuji ek din mhjh par bahut bigde, khoob daantt padi… maine sab saha… akayle mein ro liya…, ussi din sham ko Babuji ne (hamari apni bhojpuru bhasha mein) kaha “…are unka-{to him/Amitabh bachchan ko}-kochchho na hoyi, ou thheek ho jaihen, Indra Gandhi-{Late Smt. Indira Gandgi - former Prime Minister of India}-aapan jahaaj se Amerika jaat rahee, se ghur ailee, au Bambai ja ke hospital mein unka ke{Amitabh Bachchan ko}-dekhli hah, badka-badka daktar {doctor} log unkar eelaaj mein lagal badan ja, jade chinta ke baat naikhe, aajhe saanjh mein redio par bol-lak hah ki unkar{Amitabh bachchan ki}-tabiyat ab thhik ba, unkar ghar ke sab log unka se mil-lan hah ja, ghabraye ke baat naikhe…” Babuji ki ye vaani aaz bhi mujhe yaad hai jise main kabhi nahin bhool sakta, jisne mere shareer mein fir se jaan foonk di. Lekin apwaahon ka baazaar garm tha, atkalpachchu logon ki atkalen bhi dahlane wali hua karti thin “… ab Amitabh thikko ho jaitau toh kaam kare nai saktau, ….ab karbo kartau toh khali{only/sirf}chhota-mota role kartau chahe{or/ ya fir} fileem lainwe chhod datau…” …sun kar mujhe khed hota tha aur afsos bhi hota tha ki “…kahin sachmuch mein Amit Ji kaam karne se lachaar na ho jayen !… Din par din beet-te gaye shankaon-ashankaon-na`ummeedi aur ummeedon-aashaon ki tkkar hoti rahi, samay beet-ta gaya. Fir ek din samachaar sun-ne ko mila ki ek saptah ke bheetar Amitabh Bachchan ghar aa jayenge, lekin purnn swasth hone mein waqt lagega issliye filhaal kaam nahin kar payenge. Ye badi khabar thi. Main prasannta se jhoom uttha.
Iss durghtna se anjaan vyakti bhi naamcheen ho gaye.
Fir mere Shri_Big`B ek din hospital apne se ghar aa gaye. Samachaar patrikaon mein unke hospital se bahar nikalne ki, logon ko dekh kar unki taraf haath lahrane ki unki tasweeren chhapi, jismein woh bahut kamzor aur duble-patle dikhai padte thhe. Patr-patrikaon ne iss par visheshank publish kiye. logon ne jo mannaten maangi thhi usse puri karne ke liye mandiron mein pooja ki aur Ishwar ko apne-apne tarike se dhaywaad kaha , prasaad aur mitthaiyan batin. Ek utsaw sa mahol pure desh mein chha gaya. Iss prakaar ki doosri koi misaal nahi.
Samay ke beetne ke ssath meri aage ki padhai-likhai ki baaten hone lagi. Patna mein mere manjhle Jijaji banking job mein thhe, unhone Babuji se kaha ki woh mujhe Patna bhej den, jahan Main unki dekh-rekh mein rahoonga aur coaching classes kar ke apne career ke liye padhai karoonga. Babuji mujhse atyadhik sneh karte thhe, woh bahut hichkichye, lekin Jijaji ne unhen samjhaya, fir Maine bhi apni sahmati jatayi tab Babuji ki aagya mili. 1983 ke November mein Main Jijaji ke sath Patna chala gaya jahan ke “Ram Mohan Rai Seminary” ke morning science coaching classes mein mera dakhila kara diya gaya. Main Jijaji ke yahan Patna ke “Chiraiyatand ilake ke ‘Postal-park’ area mein unke dere mein rahne laga jahan meri Bacho didi aur Jijaji ke chhote bhai Mahindar Bhaia bhi rahte thhe.. Roz subah tthande ghane kohre mein Jijaji paidal mujhe Çhiraiyatand Pool(bridge)’tak chhodne saath jate thhe, mujhe ek riksha par bithate, riksha wale se bhaada (fair) puchhte, tassali kar ke mujhe  ”Do Rupay aur Pachas pase(Ddhaai rupay_Rs. 2.50)” dete ki riksha wale ko Ek rupae dena, Ek rupay wapas aane mein lagega, baki pachaas paise se kuchh khha-pi lena aur bank mein mujhse mil kar fir dera(ghar) jana_{ kahte bhojpuri mein thhe ki “…ye{one/swar “a”} go rupiya hene se, ye go ruiya hone se, baki aatthaana ke kuchchho khaa-pi lihah, au laute ghari ohija se aake hmara se bank mein bhent kar lihah, thhik noo? Main sahmati mein sar hilata, fir rikshe se coaching center paunchta, class karta aur hidayat ke mutabik laut kar unse unke bank mein milta fir woh mujhe wapas dera(ghar) jane ka route smjhate, jo samajh kar use follow karta dera aa jata tha. Iss prakaar dheere-dheere woh nishchint hote gye aur Main abhyast hota gaya.
1:27AM Midnight !!!
so good night
…jari…